Хэл мэдэхгүйгээс болоод мөнгөө хулхидуулж байна

Тэтгэлгээр суралцуулна хэмээн хүүхэд залуусыг хуурч, мөнгө монждог газрууд олон болжээ. Тэдгээр луйварчдын золиос нь ихэвчлэн хэлний мэдлэг тааруу, хариуцлагаа өөрөө биш бусдад даатгахыг хүсдэг залуус байна. Яагаад ингэж хэлэх болсон гэхээр манай байгууллагад дандаа ээж, аав нар хүүхдээ тэтгэлгээр сургах юмсан гэж ханддаг. Мөнгийг нь төлчихвөл л болно гэсэн сэтгэхүйтэй. Гэтэл үнэндээ тэтгэлэг авахад тухайн хүний хичээл зүтгэл, хандлага хамгаас чухал байдаг. Чиний мөрөөдөл, зорилго юу вэ, яагаад гадаадад суралцахыг хүссэн бэ гэхээр таг. Ээж, аав нь л өмнөөс нь гүйгээд байдаг. Ийм ээж аав нар л ихэнхдээ хууртагддаг. Та бүхэнд тус болох үүднээс Тэтгэлэг нэртэй луйврыг таних аргыг жагсаан бичлээ.

1. Бүртгэлийн хураамж болон элсэлтийн төлбөр
Ямар нэгэн тэтгэлэгт хамрагдахын тулд хэзээ ч бүртгэлийн хураамж нэртэй мөнгө төлдөггүй. Ийм үйл ажиллагаа явуулж байгаа газар бол халаасан дахь мөнгийг чинь зүгээр л авч байна гэсэн үг.
2. Сургалтын зээлд хамруулах төлбөр
Сургалтын зээлд хамруулахын тулд төлбөр нэхдэг байгууллагуудаас болгоомжлох хэрэгтэй. Жинхэнэ сургалтын зээл олгодог байгууллагууд хэзээ ч урьдчилгаа төлбөр авдаггүй. Шаардлагатай бол зээлийн үнийн дүнд шингээсэн байдаг. 
3. Тэтгэлэгт найдвартай хамруулна гэж амлалт өгөх
Бид таныг найдвартай тэтгэлэгт хамруулна гэж сурталчилж байгаа газарт хэзээ ч итгэж болохгүй. Ийм газрууд өндөр төлбөр шаардахаас гадна тэтгэлэг олгохгүй ч байж магад. Учир нь хууль ёсны газрууд хэзээ ч тэтгэлэгт найдвартай хамруулна гэж амладаггүй.
4. Байгууллагын болон тэтгэлэгт хөтөлбөрийн нэр

Хэрвээ тэтгэлэг олгодог байгууллагуудын нэрийг анзаарвал "албан ёсны", "үндэсний", "засгийн газрын" гэх мэт үгсийг өргөнөөр ашигладаг. Тэгвэл тэдгээр луйвар хийдэг байгууллагууд ч мөн адил иймэрхүү сүржин нэрсийн ард өөрсдийн хууран мэхлэх ажиллагаагаа нууцалдаг.